برگزاری نخستین جشنواره صلح و همگرایی منطقه یی در کابل
پاسبانان- کابل:
نخستین جشنواره ی صلح و همگرایی منطقه یی با حضور جوانان و فعالان مدنی افغانستان، پاکستان و تاجیکستان برای تأمین صلح در افغانستان، در کابل برگزار شد. در این جشنواره فعالان مدنی، خبرنگاران، و هنر پیشه های سه کشور برای یک روز حضور به هم رساندند و دیدگاه های شان را برای تقویت روابط میان سه کشور شریک کردند. گفته می شود هنر پیشه گان سه کشور در این جشنواره نقش بازی کردند و صنایع دستی افغانستان و تاجیکستان در این نشست برای اشتراک کننده ها نمایش داده شد.
بر بنیاد گزارش ها: در این جشنواره دست کم 10 نماینده از تاجیکستان، هفت از پاکستان و 20 تن دیگر نیز از افغانستان اشتراک کرده بودند. فعالان پاکستانی به این باورند که شمار جوانان در افغانستان و پاکستان بلند است و آنان میتوانند با اشتراک در چنین جشنواره ها مشکل دو کشور را حل کنند. از سوی هم فعالان مدنی افغانستان گفته اند که این گونه جشنواره ها میتواند روابط فرهنگی میان دو کشور را تقویت کند. از سوی هم فعالان تاجیک به این باورند که تأمین صلح در افغانستان وابسته به تلاش های شهروندان افغانستان است زیرا تاجیکستان با تلاش های چشمگیر توانسته است به این آرمان دست یابد.
انتظار می رود جشنواره ی بعدی جشنواره ی صلح و همگرایی منطقه یی در تاجیکستان و پاکستان برگزار شود.





















Comments